Canon VS Nikon .. اختار ياللي بيناسب عينك P=

ايش الكاميرا اللي تناسبني ؟ أشتري Canon أو Nikon ؟

فلانة مصورة محترفة مدحتلي Canon ، بس خالي أشوف معاه Nikon ومبسوط عليها ..

في المنتديات يمدحون Canon ، و كلهم ينصحوني فيها ..

آراء متضاربة في كل مكااان ،، وبعديين يعني ايش اشتررري ؟؟!!

:

الصراع المرير بين محبين كاميرات Canon و Nikon ..

كل واحد يروج للشركة اللي يحبها ، وكل واحد يكون متعصب من ناحيتها

… بما اننا في موسم إجازة ، أكيد كثير ناويين يشتروا كاميرا احترافية ومحتارين أيهم أحسن

:

في البداية أقولكم أن كل الشركتين بالإضافة لشركة Pentax ممتازتين، واصلين لمستوى عالي في تصنيع الكاميرات والعدسات،

إلا أن الأخيرة للأسف مالها وكيل عندنا في السعودية ، لذلك استخدامها منقرض

يعني اشتريتوا من Canon او Nikon .. لاتخافوا ابداً ولاتسمعوا للإشاعات اللي طالعة

:

.، أول ما دخلت المعهد سألنا المس أنا و البنات ، عن أحسن كام .. Canon ؟ أو Nikon ؟

كنا ننتظر جوابها ومتحمسين ، قالتلنا مافيه فرق !

كلهم بمستوى تصنيع واحد ، وكل شركة فيهم إذا انتجت كاميرا تروح الثانية تقلدها بنفس المواصفات

يعني مافي فرق بينهم.. وقالت شي مهم ” الكاميرا ارتياح “.. شوفي يدك ترتاح على أي كاميرا ؟

انتي مرتاحة لـ Canon أو Nikon ؟

واشتري اللي تريحك وتناسبك .. ..

:

بتقولوا طيب يا ريم ، ماقصّرتي .. بس احنا ماعمرنا جربنا ، ونبغى نشتري على طول ..

كيف ندري أننا بنرتاح لـ Canon أو Nikon ؟

بقولكم ايش أفضل كاميرا من وجهة نظري بناءً على ” تجربتي” و تجربتي في المعهد فقط ..بدون ما أسمع لكلام المنتديات أو أي مواقع

.. الكاميرات اللي جربت التصوير فيها :

Canon EOS 450D , Canon EOS 500D , Canon 400D ,

Nikon D90 , Nikon D700

كلكم عارفين أن كاميرتي هي Canon EOS 450D ، لما أحد يسألني ارشح له أي كاميرا ، أقوله Nikon D90

يقولوا ليه ؟ غريبه تصويرك حلو ؟ ليش ماتنصحينا فيها ؟

الجواب اللي فيه كثير من اللبس ،، الكاميرا ماعليها كلام زينه .. لكن المشكلة في عدستها الـ 18-55

الي تجي مرافقة للكاميرا .. العدسة ماتعطيك نتائج مرضية ، إلا اذا كان التصوير Indoor داخل المنزل أو لمسافات قريبة ،

أما اذا كان تصويرك Outdoor خارجي بتجيك حالة إحباااط !!

خلاصة الكلام :

* اذا كنت مستعد تشتري عدسات لـ Canon ، وماتعتمد بس على عدستها .. انصحك فيها

* اذا كنت بتشريها وماعندك نية تشتري عدسات .. أنصحك في هالحالة بـ Nikon D90

- ايش ميزة Nikon D90 ؟

ميزتها أن العدسة اللي تجي معاها هي 18 – 105 ، هذي العدسة تصور close up ، بورتريه ، وتعطيك زوم رائع على أي مكان بعيد

العدسة متعددة الاستخدامات ومرييحة ، ما تضطر تشيل هم شراء عدسة ثانية .. تقدر تعتمد على هذي فترة طويلة لحد ما تشتري

غير أن كاميرات Nikon ألوانها ناقعة وواضحة أكثر من Canon ، محد بيلاحظ الفرق الا اللي جرب الكاميرتين ..

لما طبعنا الصور بمقاس كبير أنا وصاحباتي ، حطينا الصور جمب بعض ، والصور مافيها أي تعديل فوتوشوب

والنتيجة أن Nikon كانت ألوانها أحلى و أوضح ..

:

- نصائح عامة في شراء الكاميرات :

* تقدر تحدد الكاميرا المناسبة لك ، باستخدامك .. مبتدئ ، متوسط ، محترف..

مو الكاميرا هي اللي تخليك مصور ! لاتتوقع أنك لما تشتري كاميرا احترافية انك بتصور صور احترافية

عشان كذا خليك صريح مع نفسك وواقعي ..

كيف قدراتك ؟ تبغى تطورها ؟ أو هدفك تلتقط صور سفر وذكرى ؟

* المستوى المبتدئ في التصوير ، أو المتوسط

أنصح بـ Canon ixus بكامل أنواعها .. ، يالله أحبها من قللب أبدعت Canon في كاميرات الـ Point & shoot

تعطي نتائج رووعة .. وهذي أمثلة صور من أول كاميرا أستخدمها Canon ixus 70

1 , 2 , 3 , 4 , 5

يمكن الحين الكاميرا انقرضت لأني شريتها قبل ٤ سنين ، الي عجبني فيها أنه الإعدادات سهلة ..

عكس كاميرات Sony ، ماعرفت أصور ولا صورة ، أقلب فيها يمين يسار ، هوا العيب فيني ولا في الكام ؟!

إعداداتها ماعرفت لها ومختلفة كامل الإختلاف عن اللي تعودت عليه…

ومن تجارب اللي حولي ماشفت أحد يمدح Sony إلا وحدة بس

* الكاميرات الشبه احترافية ..

للأسف ماعندي تجارب لها ، ح أستفيد من ملاحظاتكم حولها

* خدعة الـ Megapixel

للأسف صار جزء من الترويج للكاميرا .. هو عدد الميجا بكسل ، كل ماصار البكسل أكبر كانت الصورة أوضح ، وهذا خطأ !

البكسل مايفيد إلا في حالة طباعة الصورة بأحجام كبيــــرة جداً ..

٧ ميجا بكسل أو ١٠ هو عدد كافي ، مثل الصور الي فوق حطيتها .. كانت بـ ٧ ميجا بكسل !!

ولا تخلوا البياع يضحك عليكم يقول أوضح وأحسن ..

البكسل مايفيد إلا في حالة الطباعة مثل ماقلتلكم .. واللي يستفيد منها أصحاب الإعلانات والمعارض ..

و للإستزادة أكثر في هذا الموضوع طلوا على هالـ المقالة

* أماكن شراء الكاميرات .

لاحظت أن كارفور ، بست ، اكسترا .. أسعارهم أرخص من جرير ويعملوا عروض باستمرار

برضه الوكلاء مثل الحارثي ، العبدالواحد ، cam for sell .. هم أضمن شي

:

يارب استفدتوا من هالتدوينة .. دمتم بأجمل صورة