ريم و الأمومة: فصل جديد في حياتي

IMG_2179e

يالله عالأيام اللي صارت تجري بسرعة .. هذي التدونية كان المفروض أكتبها بعد ماولدت بكم أسبوع مو يوم صار عمر نور ٥ شهور ><..لكن

مومشكلة المهم أكتبها ولو بعد حين ، جهزوا كوب شاي أو قهوة لأن في جعبتي الكثيير من السواليف :eq-15:

      عام ٢٠١٦م ، أقدر أسميه عام مواجهة المخاوف.. كل شي كنت ما أتوقع أقدر أسويه سويته

كل شهور الحمل وأنا مداومة في الجامعة حتى الترم الصيفي .. والشهر التاسع خلصته ماشاءالله وعديت يومين وأنا لسا أداوم ..

 درست لحد ماحسيت بنتي بتطلع عبقرينو هههه

الولادة وما أدراك مالولادة … مريت بوقت عصيب جداً.. تمنيت إني أغمض عين وأفتح عين وألقى كل شي مخلص .. لكن ماكان أسوأ شي بالحياة .. صعب بس مقدور عليه بإذن الله .. كتبت قصة ولادتي بالتفصيل هنا

ماتخيلت إني ممكن بعد أسبوعين من الولادة أداوم في الجامعة .. كان أكثر شي مرهق عقلياً وجسدياً أن بنتي تبكي طول الوقت .. و ما آنام غير ٣  ساعات و آروح المحاضرات و من التعب يطير الكلام الانجليزي من مخي.. اتنح ولا أعرف أجاوب.. لازم أسهر عشان أشتغل عالمشاريع    والواجبات

 فعلاً من أصعب ٣ شهور مرت في حياتي و نعمة من الله أن أمي جتني أول شهر ونص وخففت عني كثيير الله يجزاها الجنة

 من الأشياء اللي تعبتني إكتئاب مابعد الولادة

.. كرهت كل شي وكل ليلة أبكي أبغى حياتي القديمة ترجع .. ماكنت مستعدة أضحي بنومي وراحتي وحريتي .. ماحسيت أنه الوقت كان مناسب إني أكون أم حتى بعد ٥ سنين زواج .. طبعاً الدكتورة قالتلي أتوقع هالإكتئاب وانه شي طبيعي .. المهم انه ما أوصل لمرحلة إني بآذي البيبي ..

الحين صرت أرجع أشوف صور نور وهي توها مولودة وأزعل من نفسي إني ما استمتعت بهذيك اللحظات ..

كان كل همي انها تسكت وتنام عشان اقدر احل واجباتي..<< رحمتني  😦

بعد كل اللي مريت فيه صرت فخورة بنفسي اني واجهت كل المصاعب وتحديتها .. عرفت اني صرت قوية أكثر من أي سنة مرت علي

 وقدرت آنجح بكل المواد بمعدل ممتاز رغم الحمل والولادة والنفاس ..ماشاءالله

كنت آتكلم مع وحدة من الأخصائيات.. واقولها اني بولد بنص الترم وماعندي اجازة غير اسبوعين..  انهبلت قالت ليش انتي مجنونة.. شرحتلها انه ماعندي اي خيار واني مبتعثة .. قالت بترسبين في كل المواد مستحيل تقدرين .. كل اللي اعرفهم مايقدرو يوفقوا بين الطفل والدراسة

 ودي الحين اروح احط شهادتي بعينها .. كانت مُستفزة مرة

تجربة الولادة في أمريكا رائعة.. يهتمون بنفسيتك ومشاعرك، كانوا حريصين جداً أنه مايكون فيه رجال .. حتى لو جا رجال كانوا يغطوني  ماحسيت بأي عنصرية كوني مسلمة

مواقف لطيفة من بعض الشعب الأمريكي

لما كنت في الشهر التاسع رحت أقضي لنور باقي الأغراض .. شفت حرمة عمرها في نهاية الخمسين تكلم زوجي.. وهو كان منحرج منها ويتشكرها ويقولها ماله داعي شكرا  وهي مُصرة.. انا كنت اتمشى وانتظره يخلص .. جاني يقول الحرمة تقول اني شفتكم تتقضو للبيبي وأنا  أعرف انه هالشي مكلف وانتوا في بداية حياتكم انا حاسة فيكم و بعطيكم هدية للبيبي .. وارجوكم اقبلوها، حاول فيها زوجي انه ماقصرتي شكراً

 وفجأتنا بهدية ..سرير لنور ، قالت أنا هدفي أنشر الحب في العالم وأتمنى لك ولادة سهلة

 أثرت فيني جداً مع إني ما أعرفها أبداً و أول مرة أشوفها.. ما ادري ايش اعبر بصراحة 

لما كان عمر نور شهر ، طلعنا لمطعم وكانت تبكي طول الوقت..  مرة أنا ادور فيها أحاول أهديها ومرة أمي .. شافتني وحدة كانت تتعشى في المطعم وقالت ممكن أشوف البيبي.. وسولفت انا وياها شوية ،، وقالتلي انا عندي ٥ اطفال بس كبرو خلاص وحاسة فيك .. انتي انسانه قوية الامومة شي صعب وانتي قدها .. قلتلها شكراً لكلامك اللطيف ،،لما خلصنا اكل وجينا نحاسب .. تفاجأنا أنها دفعت الحساب عننا  وراحت !!     صراحة دمعت عيوني واتأثرت بتصرفها اللطيف 😦

بسبب هالموقفين حسيت بطاقة ايجابية ورغبة في اسعاد شخص غريب

نصائح متفرقة من هنا وهناك 

 الآمومة شي مو سهل أبداً .. لازم تكوني متأكدة من استعدادك النفسي. ولاتخلي كلام أي شخص يأثر عليك انك تستعجلي بالحمل ،،محد بيتعب ويسهر غيرك .. فأذا انتي مبسوطة بدون أطفال عيشي حياتك

أنا ضد أن النفاس تنحبس في البيت وماتطلع.. بالعكس أحس ان الحركة والمشي تحسن النفسية و تساعد بالتعافي.. وأعتقد انه من الأسباب اللي خففت عني الإكتئاب

 اذا كنتي حامل ولسا تدرسي  وعندك إمكانية اعتذار أو تأجيل لاتترددي.. أول ٤ شهور مهمة في حياة الطفل ..للأسف المبتعثات مابيدهم حيلة 101830_0023_10.png

 هذا اللي في بالي حالياً لو تذكرت راح أضيف نقاط زيادة

:

وه أخيراً كتبت التدوينة

.. ترا لي ٨ ساعات فاتحة الصفحة واكتب كلمتين واروح للهانم الصغيرة

 لو لاحظتوا دمجت مدونتي ملاذ الخاصة بالكتب مع هذي المدونة .. حسيت أفضل يكون كل شي بمكان واحد

 أراكم في تدوينة قريبة متابعيني الأوفياء

Advertisements

25 فكرة على ”ريم و الأمومة: فصل جديد في حياتي

  1. مشااااعر حلووة

    الحمدلله على السلامة
    ومبروووووك ماجبتي تتربى بعزكم يارب وتشوفينها مثل ما تتمينن واحسن ان شاءالله

    صحيح مرات تحسينها مسؤولية كبيرة مو قادره تتحملينها بس سبحان الله
    دليل قوله
    قريت كلامك بالدوام الصباح عطاني طاقه حلوة و ان الحياة فيها اشياء كثيرر حلوه وفيها ناس طيبين فوق ما نتخيييل

    ربي يسعدك ياريم 💖💖🌿🌸🙏🏻

    • الله يسلمك ياتهاني .. يجيك احساس انك ماتقدري عالمسؤوليه بس تتسهل الحمدلله

      يارب كل صباحاتك جميلة

  2. الف الحمدالله على السلامة ..

    افهم مشاعرك جدا .. انا ضليت فترة طويلة احس اني اتسرقت مني حياتي وحريتي .. مو معناته ما احب بنتي لكن من التعب والارهاق وقلة النوم الا ما تسلل هالمشاعر في قلبي ..

    مشاعرك كأم مع البيبي الثاني راح تكون اهدأ وانضج ..

    الامومة شي كبير ومتعب وممتع في نفس الوقت .. بس حطي في بالك إن ربك مثل ماحملك هالمسؤولية بيت وطفل ودراسة.. رزقك وكتب لك القوة والمقدرة ..

    تحياتي لك ولنور الصغيرة .. ❤

    • فعلاً يا فاطمة مع أنه أكثر شيء متعب في الحياة بس بديت استمتع فيه الحمدلله

      واكيد بنتعلم من تجربة أول بيبي .. الله يسعدك يارب

  3. ما شاء الله عليك تبارك الله..
    طاقة إيجابية هائلة في تدوينتك و أعطتني دفعة كبيرة إلى الأمام بفضل الله ولله الحمد..
    شكرا من القلب على كل حرف كتبتيه و على كل وقت أنفقتيه لنقلك تجربتك الجميلة ..
    الله يسعدك و يوفقك و يجعل بنتك قرة عين لك و يجعلها من حفظة كتابه ..
    استمري يا اختي ..

    • يا مرحباً مرايم .. فرحت انه عطيتك دفعة إيجابية .. مع اني خفت اكون متذمرة قليلاً 😀
      شكراً للدعوات الجميلة .. الله يجزاك خير

  4. حبيييت التدوينة مستمتعه بالقراءه وجالسة اتلذذ باقهوة الصباح قريت التدوينة 12 ونص الظهر

    اهلا وسهلا بضيفتنا الجديدة نور ♥ في المدونة
    والحمد لله على سلامتك ☺
    من جد كثييير بنات اشوفهم في الجامعة يقطعوا ترم كامل عشانها بتولد وماتقدرعلى الجامعة وطفل بس سبحان الله اذا توكلت على ربها ربي يفتحلها ابواب كثيرة انا ماجربت الموضوع هذا عشان كذا احس انتم ممكن تكونوا فاهمين الموضوع اكثر من الي لسى ماجرب

    وانتظرك في تدويناتك مع مغامراتك انتي ونور لاتطولي

    ودي ♥☺

    • يا مراحب آمون ..
      ما خاب من توكل على الله .. وان شاءالله راح تشوفي تدويناتي بين فينة وأخرى عالاقل أكثر من زمان ><
      صباحك سعيد دائماً ♥

  5. الف الف الف مبروك اتابعك من ايام اقلاع وفتحت ايميلي بالصدفه واشوف رساله من مدونتك وطيران افتحها واقرا فرحت لك الله يوفقك ويسعدك ويسهل كل امورك

  6. اختي الغالية ،
    شعور غريب وجميل اني اقرأ هاليوميات و أعرف عن تفاصيل هاللحظات من زاوية ثانية ( غير مكالماتنا معك). و احب اقول لإيميلي شكراً لأنه جابني هنا .

    الله يحفظ لك نور و يخليها لكم. و يرجعكم لنا سالمين و نفرح بكم بيننا .

    كل مالي اشوفك اقوى و أكثر إصرار و هالشي يبعث فيني أمل و طاقة إيجابية و تفاؤل . انتي مثال حي . واجهتي كل التحديات و (أخضعتيها) بتفوقك علمياً و عملياً و أسرياً ، و تخطيتي كل عقبة واجهتك و رميتيها وراك .

    أدعي ربي بأن لايضيع لك تعب و أن يجعل لك شأن عظيم.

    والله يردك لنا بالسلامة ، لتبدأي معنا مرحلة جديدة في حياتك (مرحلة جني ثمار التعب) . ونشوفك في أعلى القمم .

    • ماتدري قد ايش فرحت بردك هنا وبكلماتك اللي اعطتني دافع أقوى اني اوصل لخط النهاية .. شكرا لدعمك الدائم لي وربي مايحرمني منك

  7. مش عارفة ليه حتى في طريقة كتابتك في حاجة اتغيرت اصبحت اكثر لطف وود من السابق
    الامومة تطغى على مشاعر المراة بشكل غريب سبحان الله ربنا يسعدك مقالتك اضافت سعادة وراحة غريبة وفرتها لحد ما اتعب من المذاكرة وقمت عملت بنصيحتك وجهزت مشروب دافي وانا اقراها❤🌾
    تقبلي مروري

    • يا آهلا بغُصن.. ماشاءالله عليك دقيقة بالملاحظة .. انا كنت حاسة انه فيه شي متغير بالاسلوب بس مادري ايش بالضبط :$ .. بالتوفيق في المذاكرة

  8. ماشالله تبارك الله والف مبروك ع المولوده.. انا اتذكر زمااان شفت مدونتك وتابعتك بتويتر ومن تخرجت من الجامعه يعني من ٥ سنين تركت تويتر، وفجاءه فتحته وقريت ريم والامومه مرره فرحت لك والله يكتب لك الخير وين ماكنتي : )

  9. ماشاء الله عليك والحمد لله على سلامتك
    والله اشوف اختي مسكينه ما صحت من ارهاق الامومة الا بعد سنة ونص لما بدا شوي شوي يعتمد على نفسه وزادت ساعات نومه بالليل .. جهد صراحه كبير محد يقدر يتخيله او يحط نفسه مكان اي ام
    الله يعظم اجرك واجر كل الامهات بالعالم ويرزهم بر اولادهم

  10. فخوره والله فيك ياريم والحمدلله تيسرت كل امورك وقريب راح ترتاحين وترجعين تستقرين ♥️

  11. أحب شفافيتك في تدوين تجاربك.

    كل الأمهات عظيمات، الله ينبت نور نباتًا حسنًا و يرزقك برها.

  12. ماشاء الله تدوينة جممميلة جدات
    حمدا لله على سلامتك ربي يحميه نور ويحفظها لكم ويجعلها قرة عين لكم

    تأثرررررت جدا بتدوينتك هذه ماشاء الله عليك واجهت كل الصعوبات وحفزتني لأني أعيش بنفس التجربة حاليا أتمنى أني أستطيع ان اكمل دراستي مع الحمل والأمومة …..

    واللي أثرتي اكثر المواقف اللطيفة اللي ذكرتيها
    جممميل جدا انه نسعد شخص حتى لو كان غريب

  13. سبحان الله ربي مايحطك في شيء الا عارف انك قدها
    الحمد لله ربي وفقك في المواد اللي ماخذتها وقت ولادتك وايام عدت بحلوها ومرها
    الله يحفظ لك الصغيره نور ويبلغك فيها 💞

  14. اهلاً ريم

    أول شي الأمومة مو صعبة لكن تجربتك كانت صعبة بسبب ظروفك ، وتمنيت انك جربتي الحمل والأمومة في وقت انتي متفرغه تماماً وماعندك دراسة بتعشينها بشكل ثاني ​


    بنسبة لي حملت وانا في أخر ترم في الجامعة ترم تطبيق تخرجت وانا مابعد بان بطني ههه كنت سعيدة الحمدلله لكن في الشهر التاسع توفت أمي الله يرحمها وكان هالشيء جداًً صعب علي يعني بعد وفاة أمي بشهر ولدت وجيت بيت اهلي وكنت مكتئبة كيف بيمر النفاس بدون أمي !! اول أسبوعين من النفاس كنت مصدومة من المسؤلية وكارهه جداً الأمومة وكنت بس اقول ليه محد نبهني ان الأمومة كذا متعبة !!
    وصرت اقول لزوجي اني خلاص انا انسانه تعيسة ومقيدة طول عمري بهالطفل !!

    بس الحمدلله فترة ومرت ومع الوقت حبيت بنتي وبالعكس صارت حياتي احلا يوم جت بنتي وفتحت حساب انستقرام زوري حسابي
    hwaml.mamat

    وبالعكس حسيت فعلاً ان بنتي فتحتلي أبواب سعادة جديدة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s