من مطبخي: الفراولة المحشية بالأوريو + أوريو ترافلز + تارت الموز والكارميل

صباح / مساء الورد 

من فترة كان عندي عزيمة بنات .. وكنت حابة أجرب وصفات حلا تحتوي على فواكه .. وتكون سهلة و شكلها جميل وجديدة 

بحثت في قوقل بالانجليزي .. ومن صورة لصورة ومن وصفة لوصفة .. لحد ما لقيت هالشي الكيووووت ..

فراولة محشية بتشيز كيك الأوريو .. << هههههه الاسم أكبر منه 😀

Oreo Cheesecake Stuffed Strawberries

المقادير :

• ١/٢ كيلو فراولة كبيرة

• ٢ علبة كريم تشيز ( زي فيلادلفيا ) حجم ٨ اونصه

• ١/٢ كوب سكر ناعم

• ١/٢ ملعقة أكل فانيلا ( نسيت أصورها )

• ١ باكت ميني أوريو

• ١ باكت بسكوت أوريو

هنا جبت بسكوت من ماركة ثانية لكن هو نفس الأوريو ١٠٠٪ و الكريم تشيز برضه ماركة ثانية .. أحب أخذ بدائل ما ألتزم بماركة محدده .. لأنه معروف في البزنس أغلب المصانع  تسوي خطين انتاج .. ماركة معروفة وماركة بإسم ثاني مومشهورة وبسعر أقل.. وتبيع منتجها بهالطريقة وبكل الحالتين هما كسبانين .. والمستهلك الذكي راح يكون كسبان في حالة عرف الماركة المستخبية 😉  << معلومة بزنسية عالطاير 

بديل الأوريو في السعودية بسكوت ديمة نيو

:

الطريقة :

• في الخلاط .. اطحني الاوريو بدون ماتشيلي الكريمة الي في النص .. ولما تنطحن اضيفي لها  باكت كريم تشيز لحد ماتتجانس وتصير زي العجينة

• في خلاط الكيك .. اخلطي باكت كريم تشيز مع نص كوب السكر و نص ملعقة فانيلا .. لحد مايصير الخليط كريمي ثقيل.. وحطيه في كيس تزيين الكيك وخليه يبرد في الثلاجة

• اغسلي الفراولة واقطعي القاعدة (عشان توقف عالصحن ) واقطعي الراس .. وبملعقة صغيرة وبحذر شديد فرغيها من الداخل

• احشي الفراولة بخليط الأوريو .. ثم كريمة التشيز .. و زيني كل حبة بميني أوريو ..

الفراولة محشية بخليط الأوريو

بعد التزيين

ملاحظات:

– عشان أكون واضحة في الوصفة .. بصراحة أنا ما التزمت بالمقادير بالضبط واستخدمت نص الكمية .. وكفت ١٨ حبة تقريباً .. وزاد عندي حشوة الاوريو والتشيز

فشوفوا اذا تحتاجوا كمية كبيرة التزموا بالمقادير المكتوبة فوق ..

– الفراولة اذا طلعت موية نشفيها بمنديل قبل ماتحطي حشوة الاوريو

– يفضل تقديمها مباشرة عشان تكون فريش .. الفراولة بعد كم ساعة تذبل والكريمة تسيح.. 

Oreo truffles

الحلا هذا ميزته أنه .. نفس مقادير الحلا اللي فوق .. أو بالأصح اللي باقي من خليط الاوريو حق الفراولة خخ  .. بترتاحي كثير لو سويتيهم بنفس اليوم .. 

المقادير :

• باكت أوريو

• علبة كريم تشيز (فيلادلفيا )

• للتزيين : شوكولاتة خام ، و سبرينكلز ، ورق زبدة

الطريقة :

• -اطحني الأوريو في الخلاط وبعد مايسير ناعم أضيفي علبة الكريم تشيز لحد ماتتماسك وتسير عجينة

• -كوريها لكرات و اغرزي عود في كل كورة .. ودخليها في الفريزر لمدة ١٥ دقيقة

• -بعد ربع ساعة .. سوي حمام مائي للشوكلت .. واغمسي كل كورة بالشوكلت .. ورشيها بالزينة .. صفيهم ع صينية مغطاة ب ورق زبدة عشان ماتلصق

• -دخليها الثلاجة تبرد نص ساعة أو الى اليوم الثاني

Banana Caramel Pie

http://www.southernplate.com/

هذا الحلا مررة أعجبني .. الموز اعطى توازن للحلا .. واندماج النكهات فيه لذيذ  

الصورة من الموقع اللي لقيت فيه الوصفة .. كان ودي تكون صورتي احترافيه .. بس كنت مستعجلة وبطلع من البيت  

المقادير :

• موز 

• قاعدة بسكوت Graham جاهزه ، (ممكن استبداله بأي بسكوت شاي أو دايجستيف ، مطحون ومضاف له زبده )

• كارميل من نستله Dulce de Leche .. موجود بأمريكا بأغلب السوبرماركتس 

لو ماكان عندك هذي طريقته :

١ علبة حليب مكثف محلى ..

في حمام مائي .. يوضع الحليب المكثف ويغطى  ، ويكون على نار وسط ، اتركيه لمدة ٥٠ دقيقة مع التحريك بين فترة وفترة .. لحد مايوصل للون الكارميل  واتركيه يبرد

الطريقة :

الطبقة الأولى بسكوت / ثم كارميل / ثم شرائح الموز ..  

ويزين بالكريمة المخفوقة ورشة شوكلت 

 فيه أسهل من كذا ؟!

ميزة هالحلا أنه له عدة طرق تقديم .. ممكن تسويه بحجم كبير أو صغير .. ممكن تسويه في كاسات .. وتقدري تتحكمي بكمية الكارميل والموز براحتك

إن شاءالله تكون عجبتكم الوصفات وتستفيدوا منها وتكشخوا فيها قدام صاحباتكم و حمولتكم  

سوولي منشن في انستقرام لتطبيقاتكم .. =* 

ع فكرة .. ايش وصفات الحلا اللي تحبوا تسووها ؟

اذا حابين توصلكم تدويناتي الجديدة ع إيميلكم .. اشتركوا بالمدونة