دوام + نفسية حلوة = كيف تجي ؟

IMG_8402

جا الوقت اللي نرجع فيه للدراسة و الدوام .. السؤال هو .. كيف نرجع للدراسة بنفسية حلوة ؟ وبدون نكد واكتئاب 

بالنسبة لي الأسبوعين اللي راحوا كانوا جميلين .. و ماجاني اكتئاب على غير العادة الحمدلله **

الإستعداد هو السر .. انك تهيئي نفسيتك عشان تواجه السنة بروح نشيطة بدون هموم .. يللا نبدأ سوا خطوة خطوة للإستعداد  

أولاً : التخطيط

جيبي نوتة واكتبي فيها ايش تبغي تسوي لهالسنة الجديدة .. مو بس في الدراسة .. حتى لحياتك .. تتبعي نظام صحي ، تلتزمي بالرياضة ، تقوي شخصيتك في ناحية معينة

اكتبي ايش ودك تغيري في نفسك ،، ونقطة مهمة لاتحبطي نفسسك ابداً .. مو عشان ماحققتي أهدافك السنة الي فاتت تقولي .. اييه كالعادة بكتب ولا راح أنفذ

اعطي نفسك فرصة و هذي سنة جديدة 

ثانياً : الترتيب

أغلبنا راجعين من إجازة وسفر .. وغرفنا حوسة الزمي نفسك بالترتيب .. من وإلى .. لما تخلصي غرفة النوم و إبدأي بالمكتب .. رتبي ادراجك وتخلصي من الاوراق القديمة في مكتبك ،علقي لوحات تفتح نفسك للدراسة .. وعبارات تشجيعية عشان تبدأي بداية حلوة

هذا مكتبي الصغير في الغربة.. صحيح كل يوم يتقربع مع الشغل بس أحاول اخليه مرتب

 ( الجو مغيّم والصورة ظلام -ـ- )

IMG_7027

ثالثاً : التنفيذ

كيف راح يكون التنفيذ ممتع و يحمس !؟

 طبعاً بطباعة الجدوال الجميلة .. هنا اخترت لكم Printables .. تقويم و خطة أسبوعية  وخطة لوجبات الأسبوع

112

هنا تصميم مختلف وجميل

Weekly planner   /   Shopping List  / Calendar   / Meal Planner

اطبعيهم وخليهم في ملف أو كليب بورد ، ويومياً اكتبي فيه مهامك ويكون معك في الجامعة او العمل .. ومعاهم ان شاءالله تودعي النسيان والأشياء اللي تخططي عليها وتنسيها .

الكليب بورد متوفر بكل مكان ، ابو ريالين والمكتبات .. و تقدري تسوي التصميم اللي يعجبك ..

اكتبي في جوجل clipboard diy للمزيد من الإلهام 

أحيطي نفسك بالأشياء الجميلة   تنتفح نفسي لما أشوف حاجات حلوة عالمكتب ومعاي في شنطتي

IMG_7038

و خلي الموية صديقك الصدوق ﴿وَجَعَلْنَا مِنَ الْمَاءِ كُلَّ شَيْءٍ حَيٍّ﴾ [سورة الأنبياء الآية: 30]

IMG_7041

مع كل صباح ، جددي النية وأخلصيها لله سبحانة وتعالى ، عشان تنكتبلك بكل خطوة وتعب أجر إن شاءالله   التخطيط مو بس للي يدرسوا أو يشتغلوا حتى لو إنتي بالبيت متخرجة أو ربة منزل و عندك أطفال .. استعملي الخطة للإهتمام بنفسك وبيتك .. كل مانجحتي بالتخطيط راح تتفاجئي  بوقت أكثر لإنجاز أشياء أكثر وخليك متوازنة ..

IMG_7000

بتكلم شوية ع نفسي .. أنا طالبة و ربة منزل  و تراني أبداً مو بيرفكت ولاتتخيلوني عايشة بنظام ٢٤ ساعة .. زي مثلاً السنة اللي فاتت ماكنت كاتبة خطة لنفسي .. بس خطة للدراسة وماشية عالبركة في انجازاتي الشخصية ( مثل التدوين و القراءة والاهتمام بنفسي ) و من جد حسيت بضياااع .. و طفشانة من الضغط 101830_0023_10.png

ماكنت أبداً متوازنة .. يعني لولقيت وقت فاضي أحوس بالمطبخ وأرتب البيت مخلية نفسي شغالة وتعرفوا شغل البيت ولاعمره بيخلص ، بس الحين تغيرت

اذا خلصت الأولويات في شغل البيت خلاص اوقف واروح أحل واجباتي و أسوي أشياء استمتع فيها .. مو لازم يكون المطبخ يلمع بعد كل وجبة ! و صدقوني وفرت وقت كثير من هالمطبخ ! ونفسيتي تحسنت في آخر شهر الحمدلله لأني صرت أعطي نفسي حقها وما أحملها فوق طاقتها  

:

و خلصنا   من زماان عن كتابة هالمواضيع ،، ايش رايكم فيني بس وأنا نشيطة وأدون وأصور .. هههه يارب دايماً 

لو صار في لخبطة في الروابط عطوني خبر أعدلها  =* .. أتمنى لكم ترم دراسي سعيد مليء بالإنجازات

إذا حابين توصلكم تدويناتي الجديدة ع إيميلكم .. اشتركوا بالمدونة  

   

Advertisements

15 فكرة على ”دوام + نفسية حلوة = كيف تجي ؟

  1. انا الحمدلله هالمستوى باديته بحماس مااحس اني مالي خلق
    بس انا فاشله جدا في تنظيم وقتي لما تزوجت صرت مره مو مرتبه وقتي
    احاول اغير هالعادة والحمدلله احس اني تغيرت شوي

    تدوينه جميله عطتني طاقة ايجابيه :”)

  2. موضوع جميل جداً ، أنا ولله الحمد دائم أبدا بحماس ونشاط لدراسه ، وصحيح التخطيط كل مره يتلخبط بس احاول أكون مرنه
    لكن هذه السنه كانت العكس بدائتي كانت كئيبه شوي بس إن شاء الله مع الاصرار بتعدل الوضع للاحسن

    ربي يعطيك العافيه 🙂

  3. انا موظفه بعيد عن اهلي
    وعايشه مع بنات
    الدوام يستنزف وقتي وطاقتي والنص التاني شغل البيت
    سايره بس احب انسدح مو لازم اسوي شس
    من الشغل بطلت اقرأ زي زمان .. وبطلت اصور وبطلت اصمم
    مادرا اقرأ واوقات اطبخ

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s