خلصنا من تويتر رحنا للإنستقرام .. يعني نقول باي باي للتدوين ؟

IMG_5235s

بصراحة ثورة برامج التواصل الإجتماعي صارت تخوفني ! ..

بدأنا بالتويتر والبلاك بيري .. رحنا عالباث و الآسك والفليكر، الانستقرام بعدين الكييك والكيك ، والحين السناب شات .. أتخيل بس لوين راح نوصل

أحن لأيام المنتديات وكتابة المواضيع .. أحن لأيام طفرة المدونات .. حتى الماي سبيس كان له نكهة خاصة pb030

.. كنا نقضي في كتابة الموضوع يوم أو يومين و كتابة التدوينة ساعات

كنا نسوي كل شي برويّة وتأنِي .. وبإستمتاع طبعاً 

افتقدت هذيك الأيام لما كنا زي العائلة في المنتدى والمدونة .. نرد على بعض ونفقد بعض .. ونتراسل رسائل خاصة نتطمن عالأحوال ..

لو تلاحظوا أغلب البرامج حالياً .. لحظية .. ايش تسوي الحين ؟ وين رحت .. جالس مع مين وين مكانك  ، ماصارت فيه خصوصيات لنا

مرة سمعت في برنامج أمريكي واحد يقول : العائلة الي ينسرق بيتها يستغربوا كيف قدر الحرامي يعرف أنهم مسافرين ..طيب انتوا حاطين كل تحركاتكم في الفيس بوك والانستقرام كيف ماتبغوه يعرف ؟! 

مع جوالاتنا .. صرنا نحس اننا مشغولين واحنا فاضيين .. ووقتنا يروح واحنا بدون انجاز .. و نتوهم بإننا لو نزلنا صورة أو شاركنا برأي أننا سوينا إنجاز بس في الحقيقة لاشيء يذكر

أنا دايماً أشتكي أنه ماعندي وقت ( هو صدق وقتي ضيق مع الجامعة ) بس لما جلست أحسب كم أجلس ساعة عالانستقرام ..

لقيت مايقارب ٤ ساعات هذا وأنا مشغولة 

صارت لما يدي تنمد عالجوال أشيك الردود .. أعاند نفسي وأتركه بغرفة و أروح الغرفة الثانية أنجز شغلات مهمة

مع أنه فيه من صاحباتي يزعلوا مني .. يقولوا ليه انتي ماتسولفي معانا بالقروب وليه مالك حس بالتويتر و صورك قليل بالانستقرام ..

الحقيقة الي تقلل من مشاركتي في تويتر وانستقرام .. غير تضييع الوقت 

أنه لو مثلاً كتبت موضوع مفيد للكل وشاركت فيه ع شكل تغريدات أو صورة تحتها كلام ..

 التويتر والانستقرام .. مالهم قاعدة بيانات Data Base 

يعني لو أحد فتح قوقل وبحث عن هالموضوع الي كتبته.. ماراح يطلعله في نتائج البحث صورتي في الانستقرام .. و كمان نادراً  قوقل يلقى تغريدات من تويتر

بينما لما أكتبها في المدونة أو المنتدى .. الشخص راح يلقى الموضوع بكل سهولة في قوقل

 .. وكثييير من زوار مدونتي يجوني عن طريق قوقل.

..

متابعيني

 ..

كم تقريباً تقضي وقت على برامج التواصل الإجتماعي ؟

هل تفتقد المنتديات والمدونات أو الانستقرام أصبح أسرع وأفضل ؟

لو يرجع الزمن لورا .. ايش البرنامج اللي تتمنى نرجع نستخدمه ؟ 

هذي تدوينة خفيفة لطيفة .. بمناسبة عودتي للوطن 

 

إذا حابين توصلكم تدويناتي الجديدة ع إيميلكم .. اشتركوا بالمدونة 

   

آخر تدويناتي في ملاذ 

Advertisements

25 فكرة على ”خلصنا من تويتر رحنا للإنستقرام .. يعني نقول باي باي للتدوين ؟

  1. أتفق معك تماماً
    بالنسبة لي لا أعتقد أن الانستغرام أو غيره سيغني عن المدونات.. فلكل منهم دوره 🙂

  2. اهلًا بك في الوطن
    بالنسبة لي ساعات بسيطة في تويتر الامر اصبح روتيني
    ايام المدونات كانت اجمل ننتظر تدوينة من اسبوع لاسبوع
    ننتظر مواضيع عشان نعلق
    كانت المساحة الابداعية اكبر
    عندي مدونتين وان شاء الله ما اتركهم
    لان المدونات تدوم اكثر من صفحات المواقع الاجتماعية

  3. موضوعك مره نحتاجه ريمي
    صدق انا من ناحيتي صار كل وقتي جوال
    كله انستقرام و تويتر و الباث
    اول كنا نستمتع في المنتديات وتنزيل المواضيع
    لو يرجع الزمن لورا ابي ترجع ايام المنتديات الجميله والايميل 🙊💕

  4. فعلاً بين كل فترة و فترة بطلع برنامج جديد و الناس تهب فيه
    بالنسبة ي ما استعمل من برامج التواصل الاجتماعي الا الانستقرام
    يجيني الهام لما اشوف صور جميلة بس الحمدلله مو ادمان عليه
    و بالنسبة للتدوين أحسه غير و له جوّه
    و ان شاء الله ما يصير موضة قديمة
    لأن الكتابة الطويلة لها متعه

    عاد ايام المنتديات ذكريات جميلة ، كنا مثل العائلة خخخ

    و نورتي السعودية يا قممر ، ولاحقتك ان شاء الله عما قريب

    • ياهلا زينب .. حتنوري السعودية 😉

      المشكلة كل برنامج يصير فيه نفس الشي .. موضة تطلع للسما ويتركوها .. وان شاءالله يبقى التدوين زي ما هو محافظ ع رونقه

  5. ريما زماااان عنك، وحقيقي مو وحشتني المنتديات، وحشتني الحياة الحقيقية بدون نت
    الحمد لله انتهى مصطلح العائلة الكبيرة والجمعات، صار في ستة وستين ألف قروب وتس وكله برود كاستس ماتفكري تقرئيها حتى… :/ ما أعرف أوقات أحدد موقفي من النت =s هو أضاف لي ولا سرق مني؟

    • يا أهليين وياسهلين بدكتورتنا .. وحشتيني يابت
      ههههههه من جد الواتساب محاصرنا بالقروبات .. كل العائلة حتى البعيدين اللي مانحتك فيهم صاروا معانا بشكل يومي ..

      اعتقد النت سرق مننا الدفء العائلي .. والاستمتاع بلحظات حياتنا 😦 حتى لما نجتمع مستحيل نجلس بدون جوالاتنا .. وبدون مانصور ونرسل

  6. أهلن بعودتك ياهني
    صحيح التقنيات والبرامج في تطور واحنا جالسين نواكبه نسيتي الماسنجر هههههه
    المشكلة ان الوقت يضيع بالساعات وأتمنى لو أننا نستفيد منه بشئ اخر يفيدنا ويفيد غيرنا
    افتقدنا للجلسات والجمعات اللي تكون خالية من شخص ماسك جواله 😦

  7. اعاني معاناه مع المواقع الاجتماعيه اخذت وقتي بشكل كبير
    بس ناويه ان شالله اغير هالعادة الموش كويسه خصوصا في هالاجازه

  8. انا المواقع الاجتماعيه اخذت من وقتي كثير وكل يوم يوم والساعات تروح واخر النهار اندم والوم نفسي ع الوقت الضايع يعني لو استفيد منه بشغله افضل والمشكله كله كلام فاضي الوتس والبي بي ام غير توتير والانستقرام يعني اقدر اقول ان اغلبنا 80% مو مستفيد من هذه المواقع : /
    بالنسبه للمدونات بدأت الاحظ انو المدونين صار فيهم الكسل متفشي وانا واحده منهم لكن صراحه المدونات تستفيدي منها اذا اختفت المدونات وصار شيء ماضي زي المنتديات صراحه خسارة وانا ما أتمني هذه الشيء يصير

  9. الله ياريم برافو عليككك … فشيتي خلقي ..هذا اللي كنت ابي اقوله من زمان
    ايام التدوين شي جممميل ورائع … ان شاءالله ييجي يوم وارجع ادون زي قبل
    عندي مدونه بس هاملتها من بعدد ماالناس صارت عالتويتر والانستغرام وانا هاملتها
    كل يوم افتح تدوينه جديده بس معرف شو اتكلم عنه .. احيانا احنن لايام قبل واروح اقري مواضيعي وتدويناتي قبل
    يمكن يلهموني في شي وابدأ اكتب ..
    صرنا اللحين مدمنين انستغرام وانستغرام وانستغرام ..

    كم تقريباً تقضي وقت على برامج التواصل الإجتماعي ؟
    *مالي وقت معين بس طول الوقت حتى وانا اذاكرر مااترك الجوال ابد
    هل تفتقد المنتديات والمدونات أو الانستقرام أصبح أسرع وأفضل ؟
    جدددننن الانستغرام غيرر عن المدونات والله اشتقت لأيامها جدد .. واشتقت لناس كانت تكتب وتركت الكتابه
    وانشغلت بحياتها
    لو يرجع الزمن لورا .. ايش البرنامج اللي تتمنى نرجع نستخدمه ؟
    المدونات واي برنامج له علاقة بالتدوين

  10. يا سعادتنا بهوني من جديد . . . ()
    عوداً حميداً . . .

    موضوع جدا مهم , و بالنسبة لي كان لي تعامل خاص مع برامج التواصل الاجتماعي في اني وضعت حد معيين جدا و تخليت عن صفحاتي بالانستقرام و غيره () و تواصلي الحالي عبر :
    تويتر + مدونتي و الوضع تمام التمام ()

    الحياة من غير النت بالنسبة لي أفضل ,
    بحثك عن المعلومة جاد
    تواصلك الاجتماعي فعلي ( بحواسك – مشاعرك – وقتك ) تمنحه فعلياٌ و تأثيره عميق رغم قلته
    سابقا ننجز ضعف مهام اليوم و نشعر ببركة الوقت

    * دائما عندي شعور ان خلف تسويق هالبرامج متطفلين لهم غاية من معرفة كل التفاصيل الحياتية لنا *

    بالنسبة للتدوين مهما انشغلت الناس ببرامج التواصل , تشتاق للمدونات , لكن عبأ اليوم على المدون زاد حتى ينافس بمواضيعه و طرحه انتباه المتابع .

    ( أكثر ما اشتقت له : رسائل البريد الالكتروني الجادة المفيدة بمواضيعها )
    وقت برامج التواصل ؟ و لله الحمد سيطرت عليه و اصبح حوالي الساعة إلى ساعة و نص
    < واضح حجم اشتياقي , عذرا على الإطالة وتشكرات لحضرة هوني الرائعة

  11. يا هلا وسهلا ريمم .. ونورتي البلد : )

    تدوينتك بسيطة لكنها جميلة كالعادة
    هذا الشي ترا الكُل صَار يعاني منُه
    لكِن المُهم إنه نحاول نعتدل فيه على
    قد ما نقدر عشان يصير عندنا توازُن في الحياة
    وغير كذا هذي المواقع حلو إنها تساعدنا ف تحقيق أهدافنا
    وناس كثير عرفت تستغلها صح ..

    ووإن شاء الله نشوفلك تدوينات بالأيام الجاية : )

  12. يا هلا فيكِ اختي 🙂
    اولا اشكرك ع المدونه الرائعه والسلسه وفي ذات الوقت مشيقة ومواضيع جذابة
    حصلت على مدونتك من خلال قوقل مثل اغلب متابعينك ..
    وارى ان مواقع التواصل الاجتماعي بالرغم من انجذاب الناس لها ..فهي جدا ممله ومضيعه للوقت إذ اني لم اكن متحمسة لها منذ البداية
    حصلت ع حساب فيسبوك فقط للتواصل مع الأهل والأصدقاء ..ونادرا ما اتواجد فيه بسبب كثرة الملل الذي يأتيني من بعده .. جميع المنشوات التي تنشر إن لم تكون صورا ..فهي كلام عامي أو نكت ..لا نستفيد منه.
    لكن ما جذبني فيه صفحات تعليميه بغير عدد يذكر وفي شتى انواع المجالات ازياء تعلم اللغه ..الخ
    اضطررت بعد ذلك للتسجيل في حساب لتعلم اللغه الانجليزية أسأل الله ان يوفقني وإياكم لإتقانها

    كل الشككر ^_^

  13. تدوينتك في وقتها ، فعلاً الحال مؤسف!
    صارت برامج التواصل تتعبنا أكثر من أنها تسعدنا ، نقضي عليها معظم اليوم وبالأخير مانقدر ننجز شغلة مفيدة بحياتنا الحقيقية!

    أنا وصلت لمرحلة أني مليت منها وماعادت تهمني ،
    انقطعت عن الجوال لفترة ..
    صرت حتى التبيهات ألغيها، وزي ماقلتي اللي حولنا يضايقون خاصة الصديقات ، والسبب نفسه!

    المدونات لها طعم غير ، فيها مجال نقاش

    الوقت اللي اقضيه فيها طويل وما حاولت احسب،
    الجوال بيدي طول اليوم إلا ما ندر.. بس الحين أقل
    وما زلت أحاول أقل أكثر ..

  14. اهلا بك انا إنسانه افتقدت مدونتك كنت لما اكون فاقده همتي اروح قوقل واكتب ريم المسعري
    استفدت كثير من مدونتك ومن دوراتك كنتي تعطيني دافع كبير للتغير

  15. من جد فقدنا أيام وجو المنتديات مره مره 😦 كنا ننتظر فعاليات رمضان والصيف ونستمتع فيها كثير $^$
    على كثر المواقع والبرامج اللي طلعت الحين ما أحس في ترابط مثل قبل الواحد اهم شيء يصور اهم شيء يرسل السناب ما صرنا نستمتع بالموجود , تروح نص العزيمه أو الحفله تصوير 😦 ! .. وفيه جملة أعجبتني قريتها قريب يقول ” if you snap chat it you don’t enjoy it ”
    أتفق معه 100% طبعاً XD
    اتذكر اول ما طلع الانستقرام مع انه كان شيء مختلف لكن جميل وممتع وبسيط الحين شيء فضيع صراحه ! بيوت الناس صارت نسخ لصق من بعض كلهم نفس الشيء وكله عشان التصوير بس 😦
    قبل كم يوم رجعت لصفحتي بأحد المواقع القديمه شفت كيف كنت اكتب والناس اللي تعرفت عليهم هناك مره حنيت لذيك الأيام بشكل 😦
    كأنت جميله وبسيطه 3>

    وأخيرا ًشكراً على تدوينتك طلعت شيء من اللي بقلبي أحب مدونتك وأتابعك من أيام 2009 وأيام الأقلاع :” 3>
    اتمنى تدونين أكثر وكل البنات اللي يدونون وترجع ايام المدونات الجميله ..3>

  16. لو تعرفي ريم قد إيش حطيتي يدك على الجرح، راح أقول تقريباً ما عاد يبان من كثر ما أصبتِ الحقيقة.
    و لو تعرفي آخر تدوينة كتبتها في رمضان كم من الوقت أخذت لتخرج بحجة إنه ما عندي وقت، و الوقت عندي بس أنا اللي ضيعته.
    و لا أزال أستغرب من ولائنا لتويتر و انستغرام مع إن أكثر الحسابات الجديدة إعلانات، ادعمني و أدعمك، و لنشر السخافات أو للسب و الشتم و قبيح الكلام.
    معك أنا في الحنين لكن الحنين لا يكفي، إذ استمر المدونون بالتدوين و لو يسيراَ سيصبح للمدونات عودة جيدة، بل مقننة، فتجربة تويتر و انستغرام ليست سيئة جداً لا بد أن نجد من يستفد منها بشكل أو بآخر.

  17. صباح الفل لك ياريم .، كلامك صح فعلاً صرنا نقضي وقت أطول عالانستقرام خاصه .. ًبصراحه وضعي يحززززززن بقوووه الحياه أخذتني عن مدونتي كثييييير ٣سنوات منها تخرجت وتوقفت وتزوجت وفانتظآر أفقس :> هههههه. وزاد الطين بله يوم طلعت وسائل التواصل الاجتماعي وكثرت أخذتني اكثر لين وصلت لمرحله إنو ماعدت اعرف لوين متجهه :< هواياتي فالتصوير والقراءة وكتابة يومياتي كلها راحت والسبب هو وجود ماهو أسرع وحشتني أيامي ايام المدونات 😦 بس اهنيك انك ليلحين متصله بمدونتك رغم مشاغلك ماشاءالله تبارك الله كنت زمان أتابعك في بداياتك ربي يحفظك ي ريم شكرًا على التدوينة اللي جات فالصميم 🙂

  18. حقيقة وواقع نعيشه
    لو تتاح لي الفرصة ألغي جميع وسائل التواصل الجديدة ماعدا الواتساب لأنه مهم ومايضيع وقت كثير
    المشكلة لما تتخلين عن هواياتك وقراءة الكتب بسبب التواصل الافتراضي اللي فرق شملنا وماصرنا نجتمع زي أول
    شيء محزن أننا نعيش معاُ كأجساد فقط .
    فعلاً ماصار فيه خصوصية وتحسين طول الوقت أنك مشغولة والوقت راح يطير منك وانتي تتفرجين ^^
    عموماً هذي المشكلة لازم لها حل =”(
    والله على أيام المنتديات أتمنى ترجع فعلاً .

    • أتفق معك يا و دق .. وسائل التواصل شتتنا بدال ماتجمعنا وصار الكل لاهي وفي عالم ثاني
      ياليت كنا بقينا عالماسنجر والمنتديات ورسايل الجوال .. ومايهون الواتساب لأنه يضل زي رسايل الجوال ..
      الحين صار صعب اركز في كتاب لمدة نص ساعة بدون ما افتح جوالي واشوف التحديثات ،، على إني أضل متحفظة ع بعض البرامج ولا استخدمها كلها
      المشكلة متفشيه في كل المجتمع للأسف

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s