سنة أولى زواج / أشتكي لمين ؟

يسعد صباحكم ،،

راح أبدأ سلسلة موضوعات قصيرة تحت عنوان سنة أولى زواج  

ماشاءالله  كثير بنات اعرفهم زواجهم قرّب و حايسين  .. ريلاكس يا صبايا وخذوا كل شي بهداوة و سعة صدر 

حبيت أشارككم بتجربتي صارلي سنة ونص متزوجة الحمدلله 
وكنت حايسه مثلكم لكن كل شي عدى ومرت سنة من غير ما احس  وكانت ذكريات جميييلة ليتها ترجع 

نبدأ بسم الله ..

النصيحة الذهبية لزواج ناجح بإذن الله ||

مهما صار بينك وبين زوجك .. خليه بينكم .. لاتشتكي لا أمك ولا أبوك ولا اخواتك
و لايطلع أي شي لأهله كمان .. مهما تضاربتوا امسكي نفسسك ولاتقولي لأحد .. هذي النصيحة راح تجنين ثمارها بعدين
السنة الأولى ملياانه مشاكل لدرجة تقولي ياليتني ماتزوجت ..  ..
وهذا شي طبيعي لأنكم مختلفين عن بعض وماتعودتوا تعيشوا 24 ساعة في وجيه بعض .. بعدين بتتعودوا عالطبايع والعادات وتتكيفوا سوا

كمثال : سوا اي شي ينرفزك او استفزك.. مو لما تتصل امك على طول تشكيها وتقولي كل سلبياته ..
” يمه شفتي من البداية مايبغاني البس على كيفي .. يبغى يفرد عضلاته علي  ”
او اي كلام تقوليه يقلل من قيمة زوجك ..

هنا Stop 

الانسان هذا حتعيشي معاه طول العمر ان شاءالله .. اذا كان رجال طيب واخلاق ومافي زيه .. لا تعيبي فيه قدام أهلك عشان مشاكل تافهه .. انتي ممكن تنسي المشكله بس امك بتحز في خاطرها انه زعلك وبتتذكر ولاراح تنسى انه جرحك في يوم من الايام

بالذااات أول سنة

حتلاحظي الكل يسألك كيف زوجك معاك؟ كويس ولا لأ ؟ مرتاحه معه ؟ 

لأنه من البداية راح يبان الزوج اذا كان كفو ولا مو كفو ،، فأهلك راح ياخذوا اي مشكلة انتي تقوليها على انها مؤشر ان زوجك يعاملك زين ولا لا ..

فانتبهي لهالنقطة .. والشيطان شاااطر بالذات بالمشاكل ..يكبرها كأنها نهاية الدنيا 

الايجابيات اللي حصلتها من هالنصيحة : 

أهلي في البداية كانوا شايلين همي كثيير  – زي أي أهل طبعاً – .. خافوا ان زوجي يكون غير بعد الزواج .. زي القصص اللي نسمعها

بعد ماعدت سنة وانا ماشتكيت ابداً من زوجي و دايم ما اقول فيه الا كل خير .. ( حتى احياناً اكون ابكي بعد مشكلة  وابوي يتصل علي .. ويسمعني ابكي .. اصرف الموضوع واقوله مشتاقتلكم ابي ارجع السعودية  )
لأن فعلاً المشكلة ماتسوى أشوه سمعة زوجي قدام اهلي ..

بعد كذا ياحبيباتي .. أهلي صاروا يقدرون زوجي كثيير عن أول الحمدلله  .. دايم يقولوله أنت في عيوننا دامك محافظ عالأمانه .. ومن هالكلام الجميل .. بكذا العلاقة بين أهلي وزوجي صارت أوثق وأقوى من أول 
كله عشان مسكت لساني وماشتكيته قدام أحد

طبعاً المشاكل اللي تسوى .. هي الضرب ، والسكر ،واذا كان مغازلجي الخ .. هذي اشياء ماتنسكت عنها ..