الطاقة من حولنا تأثر على تصرفاتنا ونفسياتنا بشكل كبير ,
سواء كانت إيجابية أو سلبية .. لكني أخص حديثي هنا بالسلبية ..
., تقوم من نومك الصباح , رايق ومافي أحلى منك .. تفطر برواق تتفرج عالتلفزيون ..
وتقول لنفسك .. آآه وين هاليوم من زمآآن ..
بعد ساعة , جلست على مكتبك بتبدأ الشغل , يفاجئك اتصال من صديقك ..
يشكيلك حالته , ونفسيته التعبانة , من أهله ودراسته وظروفه المادية ..
ومشاكله مع مديره في العمل .. إلى آخره ..
انتهت المكالمة بالمعادلة = صديقك ارتاح + انت تعبت وشلت هم .
مزاجك الجميل تعكَر بدون سبب ظاهر لك !
.,
مواقف كثيرة تبيَن تأثرنا بالطاقة لحد كبير , مثال بسيط جداً ..
لما تقرأ رواية حزينة أو تشوف فلم حزين .. كيف مشاعرك بعد ماتنتهي منها ؟
تتشبع كآبة , وتلقى نفسك ترفض تتفرج على هالفلم مرة ثانية أو تكره الرواية اللي قريتها .
والعكس تماماً , لما تقرأ كتاب سعيد أو لما تتفرج فلم كوميدي ..
.,
وجودك بين أشخاص يحملون طاقة سلبية يضر صحة مشاعرك ..
غير أنهم يثبطوا من عزيمتك ويقولولك كلمات محبطة .. هم بينقلولك التوتر , العصبية , و المزاج السيء
.,
عشان تواجه الطاقة السلبية من حولك لازم تكون طاقتك الإيجابية أعلى منهم بمراحل
حتى ماتتأثر فيهم وتواجههم من داخلك .
.,
السؤال المهم .. من وين أحصل على الطاقة الإيجابية ؟
بما إني كنت ضحية الطاقة السلبية هالسنة , و من فرط الحساسية
أتأثر حتى بالأصوات العالية والضوضاء 😦
وهالأمور تحد من فعاليتي في الكتابة والنشاطات الثانية ..
قررت أواجهها وأتعامل معها .. و إلا بكون ضحيتهم طول عمري
.,
– صلتك بالله عز وجل , وقراءة القرآن بترتيل .. يفرغ الطاقة السلبية و المغناطيسية
– أصدقائك لهم يد كبيرة في نفسيتك .. كل ما كنت تنبسط بوجودك معهم
و هم يبادلوك نفس الشعور , كل ما كانت طاقتك الإيجابية أكبر .
– انت كمان تأثر على مشاعرك بنفسك .. لما تطالع نفسك بالمراية , لما تجلس لوحدك
لما تفشل في عمل شئ .. راقب كلماتك الي تكلم فيها نفسك
غير السلبية لإيجابية ..
– اعزل نفسك في مكان هادئ , و اعمل جو خاص لك وحدك ..
استرخي تحت ضو الشموع , أو الباك يارد “حديقة البيت” ..
تنفس بعمق , حس بالهواء على وجهك ,
استمتع بكوب من الشاي أو القهوة ..
– ترتيب الغرفة و المكان اللي تجلس فيه .. يساعدك على الصفاء الذهني ويبعد التوتر
– البرامج , الأفلام ,المسلسلات , الكتب , المقالات أو المواضيع ..
تعطيك طاقة .. فـ احرص على اختيارها , وكثف من الي تزيد حماسك للحياة ..
إقتباس :
كَلِمةُ تَزُفُنا إلى الفَرحْ , و أُخرى قَدْ تهويْ بِنّا إلى الحُزنِ و الِإحباطْ !
غريبٌ مفعولُ تِلك الكلماتِ علينا ,
فَـ بربِكمْ
إما أمَطِرونا بِوابلٍ مِنْ جَميلِ كَلِماتِكُمْ و إِلا فَـ أبخلوا بِالحديث و لا تُخرِجوا لنّا مِنْ كَلامِكُمْ شيئاً !فَـ أرواحُنا جُبلتْ على الجَمَالْ , و تتأملُ كثيراً إلى رَقصةِ فَرحْ و لا تنتظر شيءً غيرُه ..
,, كل ماورد أعلاه عن تجربة شخصية 😉 .. ممكن يكون صح وممكن يكون غلط
حكَوني عنكم ..
* ملاحطة .
لا أسمح بالنقل إلا بذكر المصدر ” مدونة Honey ”
كــلامك على الجرررررح
من جد يعني دايم الاحظ على نفسي ساعات تجيني ايام
اصير فيها مسسسوطه مرره وبلحظه ممكن يحصل اي شي يعكر كل يومك
انا عن نفسي اذا تعكر مزاجي وقرفت من حالي
سويت لي جو لحالي وجلست اتذكر فيها اي بصصمه حسيت ان وجوده كويس بحياتي ومواقف تضحك سويتها او اييييي شي حلو مر علي
وغيير كيذ لازم اقراقرآن بصوت عالي وبخشووع كثيييييير ارتاح
من جد اشوف ان هذولي اهم سببين تخلين محافظه على جووي
وكمان الاصدقاء اذا كانو كويسين ومتجانسه معهم صدقييين بيأثر عليك بشكل كبيييييييير
هوني موآضيعك بطلللللللله من جد انتي اروووع تفكير مر علي
استمررررررري
صح كلامك ياقمررر .. :$
عشان كذآ أنا دايمااا احب البنوتات اللي دمهم خفيف 🙂
فيه وحده بالكليه .. مجرد اني اناضر لوجهها تصكني كئآبه .. من هالعبوس الغريب 😦
وثانيه اول مااشوفها ابتسم.. من روحها الحلوه وماأحس بنفسي الا وانا أأشر لها : كيفك ياقمر 🙂
عشان كذا لازم كل وحده مننا تحاول تكون ( طاقه ايجابيه) و تأثر على اللي حولها بالايجاااب ..
خصوصآآآ (((( الازوااااااااااااااااااج))) …. : )
احس اني طلعت عن الموضوع شوي 🙂
وش اسوي احب اسولف معك هههههههه 🙂
لانك بنت ( كلك ايجابيه) ومن نقرا لك تشحنينا بهالطاقه اللزيزه 😉
لي عودهـ
من جدددددد… 😦
أنا أكره الناس اللي ما عندهم غير التشاؤم والذم !!
يأثروون ع غيرهم بشكل مو طبيعي ، ومن غير محد يحس !!
خاصة عندنا بالجامعه ، من ناحية المواد……
إلا هاذي المادة صععععبة ، ولا هذا الدكتووور مأساه ، ولا هالامتحان كرييه !!
ما يدرون إنهم يؤثروون ع غيرهم ،
وممكن يتسببون بمشاكل لهم طول فترة
الدراسة بسبب هالطاقة السلبية…
أنا هالفترة ، صراعي مع هالنوعية من البنات ،
قاعده أحاول قد ما أقدر إني ما أتأثر بكلامهم ،
وأشجع البنات ع إنهم ما يسمعون لهم ،
وربي يكون بعون الجميع ^^
/
مشكووورة هوني حبي…
جبتي الموضوع ع العوق …
لا هنتي يارب ! 3>
بسم الله الرحمن الرحيم
السلام عليكم
في المنزل في الشارع في السوق في الجآمعة ……. في آي مكان كان وآي زمان
نجد هالنوعية من الناس السلبيين فهم إلتمسوها من واقعهم
يمر الطرف الأول بحالة سيئه يحتاج لتجريد نفسه من تلك المآسئ فيلجأ للتحدث وبالمقابل
الطرف الثاني يتحمل مسؤولية تلك الماسئ فنآتج ذلك تكون الأمور لدى الطرف الثاني
سلبية بدون سابق إنذار والطرف الأول بعد التفريغ تصبح آموره إجابية
هذي هي المعادلة التي يمارسها الكثير …
لو كل شخص حاول يركز على النقاط اللي تمده بنشاط وإجابية لوآجه كل ضغط بجو معاكس
لو الطرف الأول وآجه مشاكله بإجابية لما عكسها على الطرف الآخر
وكذلك … بالنسبة للطرف الثاني لو وآجه السلبية بطاقة وعزيمة لعكس ذلك على نفسيته
آنا معكِ بالنقاط إللي ذكرتيها:
ذكر الله والصلآة على الرسول جو روحآني يجعلنا نبحر لنفرغ سلبياتنا في وعاء
وبمالقابل نستمد طاقة “ألا بذكر الله تطمئن القلوب”
الأصدقاء آحسه لهم اكبر قدر من التأثير على نفسك وحياتك
المكان الهادئ المرتب إلي تسترخي فيه تحس بالإنتعاش يعطينا دآفع لمراجعة انفسنا
بالنسبة للنقطة الأخيرة هذي اوؤيدكِ على مضومنها وبقوة
“آنا من الناس إذا يئس وحس بدت تتكون عندي فكره سلبية لأي كان اقرأ كتاب أو اتابع برنامج
تتغير نظرتي للآفضل”
وبرأي الشخص اللي يفهم ذاته تجده شخص إيجابي يستطيع ان يصنع لنفسه إبتسامة نابعه
من دواخله
هونـي يعجبني ذائقك
كمآ يعجبني يوزرك *^
Honey ❤
من جد موضووعك بطل بطل بمعنى الكلمة !! 😀
:
" يـا حلآتها لما تشربين ذيك القهوة بالهواء الطلق 😛 .. من جد شي مو صصآحي .. في أشياء يا سبحان الله تريحك مباشرة لا سويتيها .. و أوافقك في كل كلمة قلتيها بصصرآحة "
و من الأشياء اللي تعطيني الطاقة الإيجابية وانبسط لما اقراها " مدووونتك "
اهنيك عـ هالأسلووب الشييق .. لا تحرمينـا 🙂
تحياتي لك ,,
صادقه و الله اذا شكى لك احد طاقته السلبية تجي فيك
عني احصل على الفرح من كوب قهوه و شوكولا الشوكولا لها دور كبير في التأثير على النفسيه
و سوالف مع صديقة حقيقيه تغير المزاج
موضوعك جميل شكرًا لك
مرحبااااا هوني
ممكن من سنتين بس تخلصت من الطاقه السلبيه الي كنت عايشتها والسبب صديقاتي الله يهديهم غيرت مكان شغلي وصرت بمكان جوه ( لعب + مزح + هبال ) تغيرت نفسيتي 180 درجه حتى اني اثرت بـ 2 من صديقاتي الي كنت ما اقفل الجوال منهم الا وانا في اعلى اعلى درجات الاكتئاب حتى الان لم اكلمهم وانا متضايقه اسكر وانا اضحك نقلب المشكله مزحه
ياشيخه الحياة اقصر من انا نضيعها بضيقه وغلقه
دائماً جميله يا Honey
بوستّ رائـــع ..
ماشاء الله عليكّ ..
مثل ماقالوآ “كلك إيجابيه”
أستمتع وانا أقرأ كلامكّ ،
أحس جد كأني أسولف معكـّ ..
تو كان مزآجي أووف ><" ..
بعد هالتدوينه تغيـــر ..
الأصدقاء من أكبر العوامل ..
ألاحظ البنت اللي تكون معبسه تشوفين صديقاتهـا
من نفس الطقه 😀 ..
أما المرحه والمبتسمه تلاحظين صديقاتها نفسيتهم تتغير
ألاحظها بعد على نفسي إذا جيت للمدرسه ومزآجي فووق ومروقه
ووحده من صديقاتي مالها خلق خصوصا اللي بجنبي ..
تنقلب نفسيتي زيهـآ .. أتأثر معهـا على طولً
أو العكس أأثر عليها .. وتنبسط
وحتى في المسن .. لو جتك وحده تكتب وتتشكى
غصب يضيق صدركّ .. وتنقل لك الكآبه !!
لا تحرمينـــا هوني ~ (L)
كلآمك صحيح 100 % ..
معك بكل كلمة .. حتى ألاحظ نفسي إذا ما تأثرت بالفلم ، أرجع أشوفه و انا متضايقة ..عشان أطلع حرتي XD
و لسبب مـآ .. آحسك تشبهيني بآشيآء كثير ، متآبعة و بصمت .. بالتوفيق ❤
=( ..
آه يآهوني محد قتل طموحي إلا هذي العينة ..
آكتشفت إنهآ عينة كبيرة في مجتمعنآ الإسلآمي بتهبط في همتنآ
وفي مشآعرنآ وبنصير نشوف الدنيآ كلهآ سوآد في سوآد
مع إنه مع وجود كل جآنب مظلم في الحيآة سعآدة لم يبحث عنهآ المرء 🙂
صحة مشآعرنآ هي مصدر سعآدتنآ عشآن كذآ
لازم نحآول نبتعد عن كل شئ يأثر علينآ ويزعجنآ في حيآتنآ .. 🙂
هوني ..
كل عآم وإنتي بخير .. =)
ننتظر جديدكـ يآقمر
ياجميلة كيف هي صحتك..؟
وكل عام وأنتي إلى الله أقرب والمسلمين جميعاً
موضوع بطل ، لقد كان في مخيلتي قبل مضي بضعة أشهر ..!
مايؤرق فكري كيفية التخلص من وباء السلبية والتشاؤم والسواد والكآبة ونزع جذوره من العمق ..؟
صدقيني لو لم نكن أذاناً صاغية لما كان هناك لساناً داميا ً
ولا اقصد في ذلك الا من يشتكون ويتذمرون ويهبطون من عزيمتك وتفاؤلك ..
كلماتهم تحجز مكانها في المخيخ إلى أن تتسع فبدلا من ان تبعثي شحنة موجبة يتبدل الأمر لتعم السلبية وتتكاثر لحد لا يمكن معه العيش ..!!
لقلبك ..
عفوا ليس المخيخ بل العقل الباطن ..
أعتذر
احب اضيف ان الاماكن ممكن تأثر على طاقتنا ممكن تدخلين مكان وانتي
معاكي طاقه ايجابيه وبدون لاتدرين تتحول طاقتكي الى سلبيه
هوني ياعسوله دمتي بطاقه ايجابيه ^_^
هوني `
اعجبتني مدونتك جداً جميله ،، الله يوفقك ياعسل ..
نجي للتدوينه .. ع قولتك النآس يأثرون علينآ بشكل احنا ما نتخيله وماندري عنه بالأساس ..
نبهتيني لأشيآء كنت غافله عنها ..
متشكره ياقمر ..
برايفت ::
هوني اذآ ماعندك مانع ، اضفت مدونتك عندي بالمدونه ^ــ^
كلام سليم !
فعلاً بعضاً الأشخاص العيشة معهم تجيب النكد ، اللهم لك الحمد ،
كل حاجة حزن × حزن !
بعكس الناس البشوشة والمتفائلة ، غصب تخليك مبسوط !
،،
ربي لايذوقك هم ولا حزن : )
السلام عليكم ..]
تصدقين انك لخصتي بإسلوب جدًا بسيط وراقي كيف اتخلص من الطاقه السلبيه ~
وبجد كلامك اختي يبرد ع القلب ويزيدني همة وحماسه
سبحـآن الله شكلك انتي من الاشخاص اللي يزيدون الطاقه الايجابية وعساي اكون منكم ~
وتلخيص لردي ابي اعطيك معادله تنـاسبك :
كلماتك الحلوة + اسلوبك اللطيف = طاقة ايجابية 100 %
وحبيت اضيف بعد انو فيه هناك اشخاص فيهم من الهم والضيقة الى مالا نهاية ومع ذلك تجدينهم أطمح الناس وعندهم خبرة وكيفية تعامل مع الكم الهائل من الطاقات السلبيه
السموحه منك عزيزتي ع الاطاله لكن بالمره موضوعك جذبني ~
شكـرًا ..}
إختك silent
مااااارااا عجبني الكلااام
ذووووووق وربي
لي رجعه فدييتك
ماشاء الله تبارك االله
صغتي الكلام المعاق بألستنا بالكلمات
ماننحرم منك
🙂
طيب واللي تحب تقرأ الشعر النبطي ؟
وأغلبه حزين بس يشدّني وأستمتع فيه .. ولما اخلص الاقي نفسي إكتئبت 😦
غير كذا أحيان ما اصحى من النوم مروقه ..
يعني تلاقيني دوبني فتحت عيوني وقلبي مقبوض وحزينه ومشتاقه لأشخاص بعيدين .. وكل الاشياء هذي تجمّعت عليا في بداية يومي ..
كيف ممكن أنسى كل هذا وأبدأ يوم جميل ؟
السلام عليكم
من ججد نوعيه الناس اللي كذا بدت تتكاثر انتي معليك اذا جات من جد تشكي لك وانها بمصيبه وكذا عادي اقدر اساعدها ادور لها حلول بس شوفي البنات بالبيبي كل رسايلهم كئيبه بشكل يمرض انا وحيده وانا وانا واذا ماعندكم مثل هالانسانه -فلانه-مادري كيف عايشين سار اغلب تفكير البنات انوا لازموحده من صحباتي تكون تعرف ادق ادق التفاصيل فتلقينهم بأي وحده كلمتهم وثقوا فيها شوهوا معنى الصداقهه ومن جد صادقه لما كتبتي انوا كلمه تزفنا للفرح يعني كلمه تودينا وتجيبنا بس ممكن سؤال بسيط مين كاتب هالكلام الجممميل$$